Apnormalidat físiko
Un apnormalidat físiko ta nifiká ku un parti di e kurpa di e yu tin un aspekto diferente for di normal. Un spesialista di ultrazonido ta eskaminá e yu durante e ekografia di kabes te pia. Tambe e ta wak si tin sufisiente líkido amniótiko (vruchtwater) i si e yu ta kresiendo bon.
E ekografia di 20 siman ta un eksaminashon médiko di apnormalidat físiko.
E spesialista di ultrazonido no por mira tur kos. Si no tin apnormalidat visibel, no ta garantia ku e yu ta salú. E spesialista di ultrazonido hopi biaha por wak si e yu ta muhé òf hòmber. Lo e bisa bo e sekso solamente si bo ke sa.
E seriedat di e apnormalidatnan ku por haña ta varia hopi. Tin biaha tin apnormalidat ku no ta hopi kla òf apnormalidat ku ta disparsé di mes.
Ehèmpel di posibel apnormalidat físiko
- Spina bífida (lomba habrí)
- Kráneo habrí
- Kabes grandi
- Breuk òf buraku den stoma (buikwand)
- Breuk òf buraku den diafragma
- Pia di kachapa (klompvoet)
- Ousensia òf apnormalidat di nir
- Apnormalidat di brasa i pia
- Desaroyo apnormal di wesu
- Apnormalidat di kurason
E ekografia di 20 siman i e NIPT
Tin biaha e spesialista di ultrazonido ta mira riba e ekografia di 20 siman un apnormalidat ku (tambe) por aparesé serka un yu ku un apnormalidat di kromosoma (òf otro afekshon hereditario). Den e kaso akí ta importante pa sa ku no ta tur apnormalidat di kromosoma grave ta bai akompañá ku apnormalidat ku por detektá riba un ekografia di 20 siman. Si bo ke laga tèst si bo yu tin un apnormalidat di kromosoma, opta e ora ei pa hasi NIPT.