Kon e ekografia di 20 siman ta bai?
Un spesialista di ultrazonido ta hasi un ekografia di bo yu dor di pasa e kabes di e aparato di ekografia riba bo barika. No ta hasi doló pa laga hasi un ekografia i no ta peligroso, bo yu no ta sinti nada. E ekografia ta dura 30 minüt.
Ki dia mi por laga hasi e ekografia di 20 siman?
Bo por laga hasi e ekografia di 20 siman for di siman 18 te ku siman 21 di bo embaraso. Preferiblemente bo ta laga hasi e ekografia den e di 19 siman di bo embaraso.
Unda mi por laga hasi e ekografia di 20 siman?
Bo a disidí despues di e kòmbersashon ku e partera òf ginekólogo ku bo ke hasi un ekografia di 20 siman? E ora ei bo ta traha, huntu ku bo partera, un sita pa hasi e ekografia. Solamente spesialistanan di ultrazonido ku un formashon spesial por hasi e ekografia di 20 siman.
Preparashon pa hasi e ekografia
- Bisti paña ku fásilmente bo por hisa pa saka bo barika.
Por ehèmpel un t-shirt ku un karson òf saya. - E spesialista di ultrazonido mester konsentrá bon durante e eksaminashon. Nos ta konsehá bo pa no bai ku mucha.
- Bai ku bo pareha sí òf ku otro hende ku bo konosé bon. Si e spesialista di ultrazonido mira algu ku por ta un apnormalidat, ta bon ku bo tin un hende huntu ku bo.
Asina akí e ekografia ta bai
- Ora di hasi e ekografia, bo ta drumi riba bo lomba. Bo ta hisa bo paña i saka bo barika. Nan ta pone poko djèl riba bo barika. Esaki por ta un tiki friu. E spesialista di ultrazonido ta move kabes di e aparato di hasi ekografia riba bo barika.
- No ta hasi doló pa hasi ekografia, bo yu no ta sinti nada i e no ta peligroso pa abo ni bo yu. E spesialista di ultrazonido por wak bo yu awor. Mayoria di biaha bo mes tambe por wak.
- Henter e eksaminashon ta dura mas o ménos 30 minüt.
- Wak e vidio tokante e eksaminashon.
No ta tur bia e spesialista di ultrazonido por wak tur kos bon. Por ehèmpel ora un persona tin un tiki mas peso, ora tin un sikatris den e stoma (buikwand) òf dor di e manera ku e yu ta drumí.
Un ekografia interno (via e vágina)
No ta tur kos ta visibel? E ora ei e spesialista di ultrazonido por sugerí un ekografia interno. Bo ta hasié mesora. Si bo no ke hasi ekografia interno, bo por nenga.