Kon e NIPT ta bai?
NIPT ta nifiká: tèst prenatal no-invasivo. NIPT ta un tèst di sanger. Pa e tèst di sanger mester kue sanger for di bo brasa. Bo no ta kore riesgo pa pèrdè bo yu.
Ki dia mi por laga hasi NIPT?
Bo por laga hasi NIPT ora bo tin 12 siman òf mas na estado.
NIPT ta tèst DNA
E sanger di e persona na estado ta kontené un tiki material genétiko (DNA) di e plasènta. E DNA akí kasi semper ta meskos ku esun di e yu. Asina laboratorio por analisá si tin indikashon ku e yu tin apnormalidat di kromosoma.
Tur hende por skohe pa hasi NIPT?
Sí, tur persona na estado por skohe pa laga hasi NIPT.
Unda bo por kue sanger?
Bo partera por duna bo mas informashon tokante trahamentu di un sita i unda bo por kue sanger.
NIPT serka oochi
Bo ta na estado di un oochi? E ora ei tambe bo por laga tèst bo yunan ku NIPT. Bo ta haña e resultado mayoria di biaha denter di 14 dia.
Oochi idéntiko (Eeneiige tweeling)
Den kaso di oochi idéntiko e NIPT ta mes konfiabel ku den kaso di un feto úniko. E oochi idéntiko tin e mesun genenan. Pa e motibu ei e resultado di NIPT ta konta pa ámbos yu. Si e NIPT ta indiká ku tin un apnormalidat di kromosoma, e ora ei esei ta konta pa ámbos yu. Pa ta sigur, ta hasi tèst adishonal.
Oochi fraternal (twee-eiige tweeling) i múltiple
Den kaso di oochi fraternal i múltiple e NIPT ta un tiki ménos konfiabel ku den kaso di un feto úniko. Si e NIPT ta indiká ku tin un apnormalidat di kromosoma, e ora ei no ta konosí pa kua yu e resultado akí ta konta. Pa haña sa esei, tin ku hasi tèst adishonal pa tur yu.
Vanishing twin
Vanishing twin ta un embaraso di oochi den kua un pia di oochi ta fayesé den e promé etapa di embaraso. Riba e ekografia bo ta mira, banda di un yu bibu, un saku amniótiko bashí
(vanishing twin). Den kaso di un vanishing twin NIPT ta un tiki ménos konfiabel ku den kaso di un feto úniko. E NIPT ta haña indikashon ku tin un apnormalidat di kromosoma? E ora ei no ta konosí pa kua yu e resultado desviante akí ta konta. Ta nesesario pa hasi tèst adishonal di e yu na bida.